ترکیہ کے شہر استنبول میں عالمی سطح پر معروف بین الاقوامی دفاعی صنعت نمائش (IDEF 2025) کا شاندار آغاز ہو گیا ہے، جس میں دنیا بھر سے دفاعی ماہرین، عسکری وفود اور اسلحہ ساز اداروں نے شرکت کی۔ اس نمائش میں پاکستان کی نمائندگی چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے اعلیٰ سطحی عسکری وفد کے ہمراہ کی۔ افتتاحی تقریب میں ترک صدر رجب طیب ایردوان بھی موجود تھے، جس سے اس ایونٹ کی اہمیت میں مزید اضافہ ہوا۔نمائش کے دوران جنرل ساحر شمشاد مرزا نے ترکیہ کے وزیر دفاع جنرل (ر) یاشار گلر سے اہم ملاقات کی۔ دونوں رہنماؤں کے درمیان دفاعی تعاون کو مزید مضبوط بنانے، ٹیکنالوجی کے تبادلے، مشترکہ پیداوار اور عسکری مشقوں سے متعلق امور پر تبادلہ خیال کیا گیا۔ اس موقع پر دونوں ممالک نے اسٹریٹیجک تعلقات کو ایک نئے دور میں داخل کرنے کے عزم کا اظہار کیا۔ترکیہ نے اس بین الاقوامی نمائش میں پہلی بار اپنی جدید ترین دفاعی ٹیکنالوجیز کو دنیا کے سامنے پیش کیا، جن میں تائِفون بلاک-4 ہائپر سونک بیلسٹک میزائل، گؤک سور ایئر ڈیفنس سسٹم اور گؤک بورا ایئر ٹو ایئر میزائل شامل ہیں۔ ان جدید ہتھیاروں نے بین الاقوامی ماہرین کی بھرپور توجہ حاصل کی اور ترکیہ کی دفاعی صنعت کی صلاحیتوں کو اجاگر کیا۔نمائش کے دوران ترکیہ کی معروف دفاعی فرم کَتمَرجیلر اور ملائیشیا کی کمپنی ڈیفٹیک کے درمیان ایک اسٹریٹیجک معاہدہ بھی طے پایا، جس کے تحت EREN 4×4 بکتر بند گاڑی کی مشترکہ تیاری اور برآمدات کا منصوبہ شامل ہے۔ اس معاہدے سے خطے میں دفاعی تعاون اور مقامی پیداوار کو فروغ ملے گا۔IDEF 2025 صرف ایک نمائش نہیں بلکہ ایک ایسا اہم بین الاقوامی پلیٹ فارم بن چکا ہے جہاں دفاعی خریداری سے لے کر تحقیق و ترقی، مشترکہ پیداوار اور سفارتی تعاون جیسے پہلوؤں پر بھی تبادلہ خیال کیا جاتا ہے۔ پاکستان اور ترکیہ کے درمیان دفاعی تعلقات ہمیشہ سے مثالی رہے ہیں اور اس نمائش نے ان تعلقات کو مزید مستحکم کرنے کا موقع فراہم کیا ہے۔
