عدالت کی جانب سے جاری تحریری فیصلے میں کہا گیا ہے کہ، بانی پی ٹی آئی عمران خان القادر ٹرسٹ کیس میں بدعنوانی اور کرپٹ پریکٹسز کے مرتکب پائے گئے ہیں۔ فیصلے میں کہا گیا کہ، عمران خان کو نیب آرڈیننس 1999 کے تحت مجرم قرار دیا جاتا ہے۔
تحریری فیصلے میں مزید کہا گیا ہے کہ ،عمران خان کو 14 سال قید بامشقت اور 10 لاکھ روپے جرمانے کی سزا سنائی گئی ہے، جبکہ ان کی اہلیہ بشریٰ بی بی کو کرپشن میں سہولت کاری اور معاونت کے الزام میں مجرم قرار دیا گیا ہے۔ بشریٰ بی بی کو 7 سال قید بامشقت اور 5 لاکھ روپے جرمانے کی سزا دی گئی ہے۔
فیصلے میں یہ بھی کہا گیا کہ، القادر ٹرسٹ کی پراپرٹی وفاقی حکومت کے سپرد کی جاتی ہے۔ دونوں مجرموں کو 4 مارچ 2021 میں ڈونیشن قبولیت کی دستاویز پر دستخط کرنے پر نتائج بھگتنا ہوں گے، کیونکہ عمران خان اور بشریٰ بی بی القادر یونیورسٹی ٹرسٹ کے جوائنٹ اکاونٹ کے دستخط کنندہ ہیں۔
عدالت نے تحریری فیصلے میں یہ بھی ذکر کیا کہ، اس مقدمے کا زیادہ تر دارومدار دستاویزی ثبوتوں پر تھا اور ملزمان کے وکلاء دفاع کے دوران شہادتوں کے جواب میں کوئی قابل ذکر دفاع فراہم نہیں کر سکے، جبکہ پراسیکیوشن اپنا کیس ثابت کرنے میں کامیاب ہوئی۔
