پاکستان کے شہر ڈیرہ غازی خان میں مسافر بس ٹرک سے ٹکرا گئی جس کے نتیجے میں 28 افراد جاں بحق اور 60 سے زائد زخمی ہو گئے۔
سیالکوٹ سے راجن پور جانے والی بس ڈیرہ غازی خان میں جھوک یاروکے قریب تونسہ روڈ پر ٹرک سے ٹکرا گئی۔
ڈسٹرکٹ ایمرجنسی آفیسر ریسکیو ڈاکٹر نیئر عالم کا کہنا ہے کہ بس حادثے میں 28افراد جاں بحق ہوگئے۔
ڈاکٹر نیئر نے بتایا کہ حادثے کا شکار بس میں 75 مسافر سوار تھے، حادثےمیں 60 سے زائد افراد زخمی ہوئے، تمام زخمیوں کو ٹیچنگ اسپتال منتقل کر دیا گیا ہے۔
ریسکیو ذرائع کا بتانا ہے کہ جائے وقوعہ سے بس اور ٹرک کو ہٹا دیا گیا ہے اور ٹریفک بحال کر دی گئی ہے۔
وزیر اعلیٰ پنجاب سردار عثمان بزدار نے تونسہ ٹریفک حادثے میں انسانی جانوں کے ضیاع پر افسوس کا اظہار کرتے ہوئے جاں بحق افراد کے لواحقین سے دلی ہمدردی اور اظہار تعزیت کیا، انہوں نے کہا کہ غم کی اس گھڑی میں جاں بحق افراد کے لواحقین کے ساتھ کھڑے ہیں۔
وزیراعلی عثمان بزدار نے زخمیوں کو علاج معالجے کی بہترین سہولتیں فراہم کرنے کی ہدایت کرتے ہوئے کہا کہ زخمیوں کی جلد صحت یابی کے لیے دعا گو ہیں۔
