وسطی ایشیا کے ملک ازبکستان نے ایک نیا قانون منظور کیا ہے جس کے تحت ملک میں مذہبی آزادی کو فروغ ملے گا۔
ایوان صدر سے جاری ہونے والے بیان کے مطابق صدر شوکت میر زائف کے دستخط کے ساتھ یہ قانون لاگو ہو چکا ہے۔
اس نئے قانون کے تحت ملک میں مذہبی اداروں اور تنظیموں کی سرکاری رجسٹریشن کے عمل کو سادہ بنایا گیا ہے۔
نئے قانون کے تحت مذہبی اداروں یا انجمنوں کے قیام کے لیےمقامی آفیسرکی منظوری لازمی ہونے کی شرط کا خاتمہ کر دیا گیا ہے۔
اب اس کے قیام کے لیے دستخطوں کی تعداد 100 سے گھٹا کر 50 کر دی گئی ہے۔
اسکے علاوہ نئے قانون میں مذہبی لباس پر پابندی ختم کر دی گئی ہے جس میں حجاب پہننے پر پابندی بھی ختم ہو گئی ہے۔
یہ قانون ریاست کے متعلقہ امور اور مذہب کے حوالے سے قانون کو ایک ضابطے میں لاتا ہے،کیونکہ ریاست ملک میں تمام مذہب سے تعلق رکھنے والوں کی پر امن بقائے باہمی کے لیے کام کر رہی ہے اور اسکی ضمانت دیتی ہے۔
