انقرہ:
ترکیہ کے صدر رجب طیب ایردوغان نے کہا ہے کہ ترکی اپنی دفاعی صنعت میں مکمل خود انحصاری کے ہدف کی جانب پُراعتماد اور مضبوط قدموں سے آگے بڑھ رہا ہے۔
ایوانِ صدر سے جاری بیان کے مطابق صدر ایردوغان نے کہا کہ ترکیہ نے گزشتہ چند برسوں میں دفاعی ٹیکنالوجی، اسلحہ سازی اور عسکری پیداوار کے شعبوں میں انقلابی ترقی کی ہے، اور اب ملک کا مقصد مکمل طور پر غیر ملکی انحصار سے آزادی حاصل کرنا ہے۔
صدر ایردوغان نے کہا کہ:
“ہم اپنے قومی مفادات اور سلامتی کے تحفظ کے لیے دفاعی صنعت میں ایک مکمل خود مختار ترکیہ کی جانب بڑھ رہے ہیں۔ ہمارا ہر قدم اس منزل کی طرف مضبوطی سے جا رہا ہے۔”
انہوں نے مزید کہا کہ ترکی نے اب تک ڈرون ٹیکنالوجی، میزائل سسٹمز، جنگی بحری جہازوں، اور جدید بکتر بند گاڑیوں کی تیاری میں نمایاں کامیابیاں حاصل کی ہیں، اور مستقبل قریب میں یہ صلاحیتیں مزید بڑھائی جائیں گی۔
ایردوغان نے اس بات پر زور دیا کہ ترکی نہ صرف اپنی دفاعی ضروریات خود پوری کرے گا بلکہ دوست اور اتحادی ممالک کو بھی دفاعی سازوسامان فراہم کرنے کی پوزیشن میں آ گیا ہے۔
بیان میں مزید کہا گیا کہ ترکیہ کی حکومت دفاعی شعبے کو قومی ترقی کا اہم ستون سمجھتی ہے اور 2030 تک مکمل خود کفالت کے ہدف کو حاصل کرنے کے لیے مختلف منصوبے جاری ہیں۔
