پاکستان کے نائب وزیر اعظم و وزیر خارجہ اسحٰق ڈار اور آرمی چیف فیلڈ مارشل جنرل سید عاصم منیر نے صدر رجب طیب ایردوان سے ملاقات کی، جس میں اسرائیل کے بین الاقوامی قوانین کی خلاف ورزی پر مبنی حملوں کی شدید مذمت کی گئی۔
یہ ملاقات ترکیہ کے شہر، استنبول میں اسلامی تعاون تنظیم (او آئی سی) کے وزرائے خارجہ کونسل کے 51ویں اجلاس کے موقع پر ہوئی، جس میں نائب وزیر اعظم و وزیر خارجہ سینیٹر اسحٰق ڈار اور پاکستان کے چیف آف آرمی اسٹاف فیلڈ مارشل سید عاصم منیر نے شرکت کی۔
دفتر خارجہ کے ترجمان کے مطابق، اس موقع پر اسحٰق ڈار نے وزیراعظم شہباز شریف کی جانب سے صدر رجب طیب ایردوان کے لیے نیک تمناؤں اور خیرسگالی کا پیغام پہنچایا۔ انہوں نے پاکستان اور ترکیہ کے درمیان دیرینہ، مضبوط اور برادرانہ تعلقات کی اہمیت پر زور دیا۔
رپورٹ کے مطابق، دونوں ممالک کے رہنماؤں نے دوطرفہ تعاون کو مزید مستحکم کرنے کے عزم کا اعادہ کیا اور اسرائیل کی طرف سے کی جانے والی بین الاقوامی قوانین کی خلاف ورزیوں پر مبنی کارروائیوں کی سخت الفاظ میں مذمت کی۔ ساتھ ہی ایران کی خودمختاری، علاقائی سالمیت اور اقوام متحدہ کے منشور کے تحت اس کے دفاع کے حق کی مکمل حمایت کا اعادہ بھی کیا گیا۔
ملاقات میں فریقین نے اس بات پر اتفاق کیا کہ، خطے میں کشیدگی کم کرنے کے لیے سفارتی کوششیں جاری رکھی جائیں گی اور عالمی برادری سے مطالبہ کیا کہ، وہ مشرق وسطیٰ میں امن و استحکام کی بحالی کے لیے فعال کردار ادا کرے۔
اس موقع پر غزہ میں جاری اسرائیلی جارحیت کے فوری خاتمے اور محصور فلسطینی عوام تک انسانی امداد کی بلا رکاوٹ رسائی کی ضرورت پر بھی زور دیا گیا۔
آخر میں، نائب وزیر اعظم اسحٰق ڈار نے صدر ایردوان کو او آئی سی وزرائے خارجہ اجلاس کے کامیاب انعقاد پر مبارکباد دی اور اسلامی تعاون تنظیم یوتھ فورم کی جانب سے ان کی قیادت کو سراہتے ہوئے دیے گئے ایوارڈ پر بھی مبارکباد پیش کی۔
